ក- ការករកើតនៃក្រុមជំនុំភូមិព្រះយេស៊ូ
ដោយសារព្រះគុណនៃព្រះ និងការឆ្លើយតបក្នុងការត្រាស់ហៅ រួមទាំងមានជួយជ្រោមជ្រែងយ៉ាងសកម្មរបស់ក្រុមបេសកកជននៃអង្គការ អូ អឹម អេហ្វ កម្ពុជា (OMF) នៅក្នុងឆ្នាំ១៩៩៨ ក្នុងការបង្កើតក្រុមជំនុំនៅក្នុងប្រទេសកម្ពុជា នៅក្នុងឆ្នាំនោះគ្រួសារពីរដែលចូលមកបម្រើនៅក្នុងប្រទេសកម្ពុជាគឺគ្រួសាររបស់លោកគ្រូគង្វាលគង្វាលគង់ ពេត្រុស និងអ្នក គង់ សុនអា រួមទាំងកូនទាំងពីរ មកពីប្រទេសកូរ៉េខាងត្បូង និង លោកគ្រូទន្តបណ្ឌិតយូ អន និងអ្នកគ្រូទន្តបណ្ឌិត ជិនជិន រួមទាំងកូនប្រុសទាំងពីរ មកពីប្រទេសម៉ាឡេស៊ី ហើយនឹងអ្នកគ្រូ ណា អូមី ហ្សាព។
ក្រុមជំនុំចាប់ផ្តើមការថ្វាយបង្គំជាលក្ខណៈក្រុមកោសិកាតូចនៅក្នុងផ្ទះតូចមួយ ដែលមានទីតាំងស្ថិតនៅជិតមន្ទីរពេទ្យកាល់ម៉ែត្រ ដោយមានការចូលរួមជាមួយបេសកកជនបរទេសផ្សេៗមកពីអង្គការ អឹម អេហ្វ កម្ពុជា (OMF) ហើយមួយរយៈក្រោយមកទៀតទើបមានលោកគ្រូ ចាស់ទុំពុន គ្រឹស្នា លោកគ្រូ ពេជ្រ ខេមរិន និងអ្នកគ្រូ ពត ម៉ាឡាក់ រួមទាំងយុវជនស្នូលវ័យក្មេងមួយចំនួនទៀតចូលរួម ហើយត្រូវបានហ្វឹកហ្វឺនអោយក្លាយជាអ្នកដឹកនាំ។ ក្រោយពេលការចាប់ផ្តើមបានមួយរយៈក្រុមជំនុំបានជួលអាគារ ចាប់ផ្តើមបើកទ្វារការថ្វាយបង្គំជាលក្ខណៈក្រុមជំនុំនៅថ្ងៃអាទិត្យ រួមទាំងមានការផ្សាយដំណឹងល្អ ការបង្កើតសិស្ស វគ្គបណ្តុះបណ្តាល និងកម្មវិធីសិក្ខាសាលា។
ក្រុមជំនុំបានបន្តបង្កើតព័ន្ធកិច្ចមួយចំនួនដូចជា ព័ន្ធកិច្ចកុមារ ព័ន្ធកិច្ចយុវជន និងនិស្សិត ថ្នាក់ភាសាអង់គ្លេស ថ្នាក់អក្ខរកម្ម កម្មវិធីកីឡា និងថ្នាក់តន្ត្រី រួមទាំងការចេញទៅបង្កើតក្រុមកោសិកា និងក្រុមជំនុំសាខា ដែលនៅពេលនោះមាន ក្រុមជំនុំព្រែកព្នៅ ក្រុមជំនុំទួលសង្កែ ក្រុមជំនុំភូមិពាម ដោយមានការជួយជ្រោមជ្រែងរវាងជនជាតិខ្មែរ និងបេសកជនបរទេសផងដែរក្នុងការដាំ ហ្វឹកហ្វឺន និងបន្តថែរក្សាដោយនៅពេលនោះអ្នកដឹកនាំ ចាស់ទុំរបស់យើងសព្វថ្ងៃកំពុងតែស្ថិតនៅក្នុងវ័យក្មេងៗនៅឡើយ។
ដោយសារព្រះគុណនៃព្រះ និងមានការជួយគាំទ្រនៅក្នុងអធិស្ធាន និងការថ្វាយដង្វាយរបស់បងប្អូនដែលនៅក្នុងស្រុក និងនៅក្រៅស្រុកដើម្បីរៀបចំសាងសង់អាគារក្រុមជំនុំនៅថ្ងៃទី ២០ ខែមេសា ឆ្នាំ២០០៦ ការសាងសង់អាគាររបស់ក្រុមជំនុំត្រូវបានចាប់ផ្តើមឡើង ដោយមានលោកគ្រូ អ៊ុំ គីយ៉ុង ជាបេសកកជនជនជាតិកូរ៉េខាងត្បូង និងអ្នកដឹកនាំផ្សេងៗទៀតទទួលខុសត្រូវនៅក្នុងការចាត់ចែងរៀបចំក្នុងការសាងសង់។ នៅក្នុងឆ្នាំ២០០៧ អាគារក្រុមជំនុំត្រូវរៀបចំដាក់់សម្ពោធជាផ្លូវការ ហើយឈ្មោះរបស់ក្រុមជំនុំក៏ត្រូវបានប្តូរពីឈ្មោះ "ក្រុមជំនុំមេត្រីភាពគ្រីស្ទបរិស័ទកាល់ម៉ែត្រ" ទៅជា "ក្រុមជំនុំមេត្រីភាពគ្រីស្ទបរិស័ទភូមិព្រះយេស៊ូ" ។
ក្រុមជំនុំនៅតែបន្តបេសកកម្មរបស់ខ្លួនដើម្បីថ្វាយសិរីល្អដល់ព្រះ រួមទាំងបន្តគោលដៅ និងនិមិត្តដែលព្រះប្រទានទៅមុខនៅក្នុងការបង្កើតក្រុមជំនុំ២០០នៅទូរទាំងប្រទេសកម្ពុជា និងនៅបរទេស។ ពីមួយថ្ងៃទៅមួយថ្ងៃក្រុមជំនុំព្យាយាមបង្កើតថ្នាក់ព្រះបន្ទូល ផ្សាយដំណឹងល្អ បង្កើតក្រុមជំនុំតាមផ្ទះ និងតាមតំបន់ដោយមានគោលបំណង និងនិមិត្តចម្បងនៅក្នុងការបង្កើតអ្នកដឹកនាំ២០០នាក់ និងក្រុមជំនុំចំនួន២០០ក្រុមជំនុំនៅទូរទាំងប្រទេសកម្ពុជា និងឈានទៅបញ្ជូនទៅបង្កើតនៅក្រៅប្រទេសផងដែរ។
ខ-រចនាសម្ព័ន្ធរបស់ក្រុមជំនុំ
យើងអរព្រះគុណដល់ព្រះជាម្ចាស់ដែលទ្រង់តែងតែការពារថែរក្សាក្រុមជំនុំរបស់ទ្រង់ ដោយទ្រង់បានត្រាស់ហៅអ្នកម្រើរបស់ទ្រង់ឲ្យបន្តកិច្ចការបម្រើក្រុមជំនុំភូមិព្រះយេស៊ូ ដើម្បីថ្វាយសិរីរុងរឿងដល់ទ្រង់ ហើយនាពេលបច្ចុប្បន្នក្រុមជំនុំត្រូវបានដំណើរការដោយមានការជួយមើលថែរក្សាពីក្រុមប្រឹក្សាគណៈកម្មាធិកា។
|
ក្រុមប្រឹក្សាគណៈកម្មាធិការបស់ក្រុមជំនុំ |
តួនាទី |
|
លោកសាស្ត្រ. វេជ្ជ. ឈិន សែនយ៉ា |
ចាស់ទុំ |
|
លោក ពុន គ្រឹស្នា |
ចាស់ទុំ |
|
លោក សម ហ៊ាញ |
ចាស់ទុំ |
|
លោក សាត មុនីរ័ត្ន |
ប្រធានក្រុមប្រឹក្សាភិបាល |
|
លោក ផូ រ៉ាឌី |
គ្រូជំនួយ |
|
លោក វ៉ា សុភ័ក្ត |
គ្រូជំនួយ |
| លោក ញ៉ាល់ សីលា | ប្រធានហិរញ្ញវត្ថុ |
| លោក មិញ សុវណ្ណា | ប្រធានក្រុមថ្វាយបង្គំ |
| លោកស្រី សុខ សុគន្ធធារី | ប្រធានព័ន្ធកិច្ចកុមារ |
| លោកគឹម សុគន្ធ | ព័ន្ធយុវជន និងនិស្សិត |
គ-គោលជំនឿពួកសាវ័ក
ខ្ញុំជឿលើព្រះជាម្ចាស់ ព្រះវរបិតា ដែលមានគ្រប់ព្រះចេស្តា ដែលជាព្រះអទិករបង្កើតផ្ទៃមេឃ និងផែនដី។ ខ្ញុំជឿលើព្រះយេស៊ូគ្រិស្ត ព្រះបុត្រាតែមួយរបស់ព្រះអង្គដែលជាព្រះអម្ចាស់របស់យើង ដែលចាប់កំណើតដោយព្រះវិញ្ញាណបរិសុទ្ធ និងដែលប្រសូតនៅនាងម៉ារីជាស្រីព្រហ្មចារី។ ព្រះអង្គបានទទួលការឈឺចាប់នៅជំនាន់លោកប៉ុនទាសពីឡាត់ ព្រះអង្គទ្រង់ត្រូវគេឆ្កាង ព្រះអង្គទ្រង់បានសុគត ព្រះសពទ្រង់ត្រូវគេយកទៅបញ្ចុះក្នុងផ្នូរ។ ព្រះអង្គឈ្នះលើសេចក្តីស្លាប់ នៅថ្ងៃទីបីព្រះអង្គទ្រង់មានព្រះជន្មរស់ឡើងវិញពីក្នុងពួកមនុស្សស្លាប់។
ព្រះអង្្គយាងឡើងទៅស្ថានបរមសុខ ព្រះអង្គគង់នៅខាងស្តាំព្រះអម្ចាស់គឺ ព្រះវរបិតា ដែលមានគ្រប់ព្រះចេស្តា ហើយព្រះអង្គនឹងយាងពីទីនោះវិញ ដើម្បីជំនុំជំរះមនុស្សរស់ និងមនុស្សស្លាប់។
ខ្ញុំជឿលើព្រះវិញ្ញាណបរិសុទ្ធ ខ្ញុំជឿលើក្រុមជំនុំសកលការប្រកបគ្នារបស់ពួកអ្នកបរិសុទ្ធ ការលើកលែងទោស ពីអំពើបាប ការរស់ឡើងវិញរបស់ពួកអ្នកស្លាប់ និងជីវិតអស់កល្បជានិច្ច។